呢間公司真係超奇怪, 可以令一個人自動消失, 連要消失那個人都不知 (呢個係我講既, 佢當然知道啦, 做左幾十年人, 係呢行咁多年, 有咩未見過), 咩都無執, 只係拎自己個手袋走.......

講緊既係我大姐姐 (sales director), 佢俾公司炒左, 我吾知咩原因, 亦聽吾到d咩是非, 不過走得咁急, 不外呼三個原因, 1)做商業間諜 2)收回佣 3)高薪挖角.............我老公話佢肯定吾係辭職, 一人之下, 萬人之上, 又做左咁多年, 點會無拉拉辭職!! 但我諗若然係第一同第二個原因, 佢個名係呢行咪臭哂, 呢行吾係好大咋咼, 無必要為左跳槽, 整衰自己個名呀...............唉!! 呢d高層次既嘢, 我吾會明, 亦玩吾起!!

由於件事黎得太突然, 完全無交接, 又無新阿頭頂上, 真係有些徬徨......對我黎講, 佢既離開只係突然, 我同佢根本吾熟, 所以無話捨吾捨得, 係我阿姐驚d者, 佢平時直接同大姐夾, 而家無人睇住, 佢又吾想下下搵鬼佬, 所以佢都要d時間適應

一年一度既Camping又黎啦, 定左4/21 - 4/25, 但只有7個人參加, 其餘兩個因為老公吾贊成, 所以吾參加了, 其實燒賣都叫我吾好去, 因為佢想我陪佢, 但佢知我想去玩, 而佢又請吾到假, 所以只好答應......嘻嘻

大家都向公司請假了, 除左我............我還在掙扎, 我若然係3/21前遞信辭職, 就吾駛擔心請假既問題, 因為都係自己時間!! 但我最近又吾想辭職住,  可能近排工作量都ok, 都係7pm-7:30放工, 而我阿姐又無之前啄得我咁緊, 仲同我講笑添, 覺得其實份工都吾係咁差者..........我叫自己堅決d, 認定將來條路想點..........吾好拖黎帶水, 好以對上份工咁, 話走話走..........都拖左成年!!

又或者好似剛返左兩個禮拜咁, 話辭職.........後來又話為雙糧為花紅, 又話做到月尾........好啦!! 到12月底, 又話一出雙糧就辭工, 覺得好難睇.......到過左年, 又同自己講新正頭遞信吾好睇......唉!! 就係咁, 又做左五個幾月, 每日都同自己講話吾會忍..........但又每日都好俾心機做嘢, 好矛盾  燒賣話, 根本你就吾想走, 你只係吾想返工, 你只係吾想加班者........若然未來都係7-7:30pm就可以放工, 咪做落去囉.........直至一日頂吾順先算!!

真係.......吾知自己想點, 好討厭自己咁拖黎帶水, 係為左乜嘢呢?? 怕吾好意思?? 經濟原因?? 怕無工做會悶??

真的很想出外走走....所以上星期馬上訂票過澳門睇ZAIA, 順便過去食下嘢, 賭兩手....嘩哈哈

吾講吾知, 原來ZAIA做埋2/19就暫定演出, 其實一直都有興趣睇, 只不過這演出比較冷門, 水舞間同ZAIA兩者之間, 我選擇睇水舞間, 下次有機會才睇ZAIA.......而結果的確麻麻, 好像睇馬戲團咁, 跳下拋下波咁, 無乜驚喜, 10分我會俾7分, 而水舞間我會俾9分..........散場時仲聽到有d人話中途訓著, 真係失敗!! 暫停演出都好既, 可引入其他新原素..........

今次過澳門, 我地試左一間葡國餐廳, 選擇同味道都不錯, 只係咸左少少, 要飲好多水, 但我都會推介俾朋友去試下, 吾一定去酒店食buffet既, 而家自由行咁普遍, 去到酒店想好好食一餐, 都要爭先推後, 就無癮啦.......除非真係好想好想試

黎到澳門, 當然去玩大細啦, 今次玩左$1080, ok啦........我安慰自己, 都有win過幾次既, 只係自己想玩下去, 咪輸番  老公都有玩幾鋪, 跟住睇我玩囉 ~.~

呢幾年.........過親澳門都係即日來回, 因為房租實在太貴, 船票+酒店+洗費等如去一次台灣, 所以寧願早d出發, 坐夜返........其實澳門吾算大, 而可以玩既地方也不算多, 所以下一次吾駛好似今次咁, 坐8:05am船過澳門, 10:30pm返香港, 因為早起身+行成日已很累, 返到屋企, 沖埋涼上床訓已經成1am  

老喇..........最遲12am就要上床訓........否則遲睡遲起一個循環, 對身体不好!!

今日舊同事黎我家團拜......我已打掃好啦, 食物/飲品/遊戲利是都準備好了!!

這班舊同事中, 只有兩個仲係舊公司做, 其餘七個都轉工了..........不知大家有無後悔呢?? 而我....又不可說後悔, 只可說而家這份新工比舊公司吾係好很多, 工作量也不比以前少, 壓力也不比以前輕!! 因為.............人工比以前高少少囉

我真係好厭倦這一行, 我不是吾想返工, 我係吾想做這一行, 做一份這麼大壓力大的工作, 這幾年我心理/生理都累透了, 沒有剛出黎做工那股衝勁/熱誠........初初畢業乜都吾識, 乜都想學, 所以吾介意OT, 但而家既心態係賺錢, 有無嘢學吾重要, 我只想收入穏定, 工作時間穩定........並吾係返到屋企已經8/9pm, 仲要帶返屋企做, 無錯.........若然workload吾大, 都吾駛俾咁高人工我, 我真係寧願佢俾低d人工我, 俾個junior位我做, 我吾想一個人跟一個account, 無人問無人幫......

辭職........我會!! 但等待一個好的時機.............

返左新工兩個星期了, 臨放工前 (已經6:45pm)姐姐叫左我入房傾計..........唉 ~~ 佢問我返左工兩個禮拜, 問我覺得點?? 又講過去兩星期做的東西交俾我既工作都吾算多, 黎緊個禮拜就會交多d俾我, 見我真工夫..........好大壓力呀

咁我答佢還在適應中, 有d工作要多少少時間, 未必即刻覆到佢.........佢千叮萬囑提我係度做嘢一定一定要小心 / 清楚...........其實佢吾講我都知, 我見佢做嘢既方式就知啦, 我覺得自己跟80後無分別, 怕辛苦/怕承擔...........其實我又吾係第一日出黎做嘢, 點解還是船頭驚鬼船尾驚賊呢??

唉........我同燒賣講, 佢話我諗多左咼, 過一排就會適應, 又話其實一般buying office既工作性質都係咁, 叫我不要擔心!!

仲有頭先食dinner期間, 餅琼又打黎, 但我聽吾到響, 所以miss左佢個call..........我無覆番佢, 因為我知佢找我做乜.......

真係忍無可忍...........今天我終於對那個電話推銷員開火!!

P -- 我
S -- 推銷員

P: 喂........喂.........喂.......(喂左幾聲先有人回應)
S: 喂........嚴小姐, 你好呀, 我地係xxxx 美容中心, 我地公司而家想誠意邀請番你, 試做我地xxx 全新facial........

P:(我無出聲)
S:嚴小姐, 平時有無做開facial呢?
P: 有呀
S: 咁係人手facial定係儀器facial....
P: (我吸一啖氣, 因為上火啦 ), 咁有咩直接關係呢..........
S: 其實人...........XXX
P: 我係個"人"字度折住佢, 我話其實我自己己經有相熟既美容院, 做得好好,而我亦都係好滿意
S: 嚴小姐, 其實我吾係想叫你轉美容公司, 只係想你體驗下我地既服務

P: 我好炆話........真係吾需要啦, 同埋呢, 你地打過好多電話黎, 我都同你地講左我無興趣咯, 同埋我叫左你地將我個電話係你地個contact list度delete, 點解你地仲要打黎?? 哈..........條女竟然駁咀, 話我搞錯, 佢第一次打黎
S: 下.......小姐, 會吾會搞錯呀? 我第一次打黎咋....
P: (火都黎, 即刻噴佢) 你係第一次打黎, 但你公司吾係第一次打黎呢, 駛吾駛我將你地打黎既紀錄print番俾你地睇呀?? 仲有呀, 點解你地鍾意係人地開緊工既時候打黎, 我而家開緊會架!! 我吾該你地即刻將我地電話係你地個contact list到delete!!! 吾好再打俾我  
S: 佢有點驚 ............仲口窒窒咁話, 咁我地會將你個電話delete, 以後都吾會再打俾你

呢間公司真係顛架, 係咁打黎 (起碼一星期兩次, 有時三次添), 我真係咩方法都用過, 但佢地居然死纏難打, 我就同你講得清清楚楚
1) 吾聽電話
2) cut佢線
3) 叫佢吾好再打黎, 無興趣
4) 打返俾佢, 叫佢將我個電話delete........點解個電話係單向架, 只可打出, 我打返去永遠都係忙線!!

我當然明白個女仔只係負責打電話, 真正sell我買package既係另一位, 但我真係忍無可忍!! 我都講左無興趣, 你再打黎都係無用, 只會影響你公司既聲譽!! 其實我對送上門既嘢真係無乜好感/興趣, 邊有咁著數既嘢, 不勞而獲!!

我問過身邊朋友, 佢地好少收到呢d電話, 就算有都吾會我好似我咁多........都吾知邊間公司將我既電話賣俾人, 離哂譜

今朝有另一個agent打黎, 問我係咪仲搵緊工, 我話吾係呀, 佢問係咪已經返緊新工, 我口快快答未呀, 8/22 (mon)先返工!!

佢話手上有份工幾岩我, 同埋benefits好過我cfm果間, 問我有無興趣試下去interview, 我話俾d時間我考慮下, 轉頭打俾佢

- buying office
- 5 days working
- public holidays, 14 days annual leave
- salary 22K (guarantee 14 months)
- title: senior merchandiser
- location: lai chi kok

真係好吸引........但我又諗邊有咁荀既工, 有既都吾會有空缺啦........呢間係國際大公司, 我怕生意超大, 工作量好重, 又要管人........所以真係吾敢立亂試!! 同燒賣商量後, 佢叫我試下囉, 又吾一定請你  haha........但我對自己有信心嘛, 我怕人地真係請我, 而我原來係無心返 工, 咁咪浪費人地同自己時間  

最後我還是決定一試, 我覆返agent, 話我想試下, 叫佢幫我send份cv過去, 安排interview!!

份工真係confirm左啦.............約都簽埋, 現在等返工吧 

跟我簽約是一位男士, 佢原來身兼HR/Logistics/Financial Controller, 言談舉止都幾溫文爾雅, 佢叫我返工第一日再搵佢, 佢會再詳細講解公司既policy俾我知, 呵呵.......即第一天都係上課日

燒賣book左枱同我慶祝, 其實佢想找個藉口食餐好  -- 不過我要早少少出門口, 因為地點係深圳大漁鐵板燒, 西鐵轉巴士再轉深圳地鐵兩個站...........車程已經90分鐘, 我仲以為好近.......那燒賣日日深港兩邊走實在太頻撲了, 吾怪得佢日日放工都話累, 吾想說話

試過深圳分店後, 我還是喜歡上海分店, 環境/食物質量各方面都比深圳好, 所以這間店我試一次就夠, 除非我真係真係好想再食!! 其實香港都有類似的店, 只不過比深圳貴好多, 或者因為地區 (港島/九龍)同師傅既級別, 平均都要$300/人

ke ke........今日無拉拉戚起條筋想食曲奇餅, 吾係普通在超市買的, 係好出名既"曲奇四重奏", 其實間餅店都開左幾年, 生意仲愈做愈大, 而家共有3間店!!

本來只係想試下佢地既曲奇餅, 點知係openrice看過食評, 佢最出名既吾係曲奇, 係"蝴蝶酥", 咁就真係要試一試啦!! 去到銅鑼灣找了一下都找到了, 間店吾算好大, 人也不算多, 可能平日關係!! 看到一個個玻璃樽裝著曲奇/蝴蝶酥, 可以隨便試食............每一塊係正常既一半份量, 每款試一口都飽.........哈哈

試過後, 我買了兩包蝴蝶酥 (好香牛油味, 好脆, 吾太甜), 一罐什錦曲奇餅, 一包咖啡合桃曲奇, 已經$306, 好貴啊.......所以沒有買太多  下次有錢先買多些.....

之後去左sogo超市行下, 買左一pack豬扒, 佢醃好, 我返去煎一下就可!!

之後就去Ikea行一陣, 其實都有目標既, 我想買一個煲, 其實之前係沙田Ikea店已買了一個, 打開先發現個蓋根本蓋不上, 拿去換一個新又沒有貨, 只好退錢............這兩星期行過一田, 千色店都無一個類似既, 只好去銅鑼灣店碰碰運氣.....呵呵.......有很多貨呀, 我馬上買一個, 然後俾錢走人!!

因為約左sandy 6:30pm係荃灣MTR站交數曲奇, 況且仲要趕回家煮飯, 所以吾可以再逛下去!!

今朝agent打黎同我講, cfm我8/25可以返工........我以為自己聽錯 --> 8/25?? 佢重覆一次係8/25, 我問點解咁遲先可以返工既?? 我隨時可以咼...........佢話可能記錯左另一個客, 以為我呢排吾係香港, 所以吾可以返工住!! 佢會再打去, 更正番其實我可以隨時返工!!

下午我去左食魚湯米湯, 今次我吾敢亂黎 (豉油+辣椒油), 只點了一客多春魚同埋一客魚滑米線.........就係呢個時候, 個agent打黎話最快返工係8/22 (mon), 因為公司而家裝修緊, 若然我呢個時候返工, 可能做嘢吾係咁方便  咁無辦法啦, 唯有等到8/22!! 既然我都打算出黎做嘢, 咁梗係想愈快返工愈好, 點知仲係要等..............其實我真係懷疑.........究竟佢地急吾急人用架, 由1st inteview (7/11) 到今日final confirm (8/2), 到8/22 (mon), 總共42日, 呢42日佢地可以handle埋我既工作, 咁我呢個位.........係咪重要架?? hey........吾好理啦, 做好自己份內事就算, 吾好理d管理層咁多嘢